なし

心情抒發(難忘的初戀) posted by 艾see賓奴@hkgolden 25/3/2008 14:23
http://forum3.hkgolden.com/view.asp?page=1&message=1165861

//*********************************************************//
今日係我初戀女友生日
所以想係度分享下我同佢的往事
(真人真事，部份由家人口中聽番，所以唔好話點解咁細過架野都會重記得、同埋無甜故內容更加唔會加”是咁的”，費事當我假膠)

係我3歲果年岩岩搬入屯門住
因為係新屋苑入伙
所以大部份都係其他區度搬過黎
由於當時商場內未有鋪頭開
所以好多時都要去安定友愛果邊d超級市場買野

果日差不多每逢星期六、日都會去過去買野
買完會去周圍行下慢慢行番屋企
買野途中好多時會撞到一些住樓上樓下或者附近的鄰居
家人都會好有禮貌地同對方打招呼及閒聊幾句
就係果d時候我就會同鄰居d朋友一齊行出鋪頭門口玩
相識最耐的朋友就算而家大左到都重有keep住聯絡
不過最深刻就係係果時認識到我第1個女朋友阿恩(真名)
佢當時係住係我樓上果層
所以家人同佢地都幾熟
=-=-=-=-=-=-=-=
讀幼稚園的時候
我同佢已經係同一間學校讀
果時家人要番工好忙
無時間去照顧我
好多時都會拜托阿恩家人去接我去佢地屋企
等佢地收工番黎接我番去
同佢及屋企人相處的機會好多
可能佢地得一粒女
所以佢地都好錫我
係果時
我家人有時會招呼佢地去我地屋企食飯
佢地又會間唔中招呼我地上佢屋企食飯
星期六日重叫埋其他隔離鄰舍開”台”打牌
我地d細佬仔女就同d比我地大的哥哥姐姐一齊落街玩

準備升上小學
由於岩岩有新小學建先無耐
我同佢既家人好順理成章咁揀左果間
更兩個都入到該學校
就係咁我既生活摸式都係同幼稚園時一樣
放學就去佢度做功課溫書玩
好彩就可以番自己屋企食飯
如果家人要加班就同佢地食

係果時我同佢成績都算幾好
或者可能係互相影響啦
佢唔識既野我會教佢
我唔識佢都會教番我
每次都可以考到班十名內、同級20名內
=-=-=-=-=-=-=-=
小學升中學時揀學校
岩岩又有兩間新學校啟用
咁就係度揀
果時佢問我會揀邊間
我揀左宣道
佢對我講”你揀宣道呀？咁我揀左另一間咪見你唔到？咁我都揀同你同一間啦”
就係咁決定左我同佢中學的去向

小學升中一果年暑假
我家人同佢家人一齊去石澳游水
去到佢話其實唔多識遊叫我教佢
咁我讀小學果時平時有去社區會堂學過
都叫做識識地但唔精
所以都係咁意教佢1 d基本野
教教下佢問我
阿恩 :如果下次我游水浸親你會點呀？
我 : 緊係去叫救生員啦
阿恩 : 叫完呢?
我 : 睇佢點救你囉
阿恩 : 點解你唔黎救我呀?
我 : 我游水又唔係叻，唔想1個人游、2個人浸親、4個人上岸
阿恩 : 咁你可唔可以當係為左我去學好d游水？
我 : 痴線…我識游就得啦關你乜事
阿恩 : 咁無野啦

之後呢件事佢足足嬲左我成個禮拜
果時我都唔知佢為咩而嬲
就算我同番我表姐講番
佢都剩係話左我一句死蠢就算
=-=-=-=-=-=-=-=
暑假就黎完
有次我同幾個老死去踢波
踢完波坐底攤抖吹水
無啦啦傾開講到我同阿恩既近況

(幾個人輪流講，唔太記得邊個講邊個句，所以剩用老死代替)
老死 : 阿倫，最近同阿恩點呀
我 : 乜野點?
老死 : 緊係果d野啦
我 : 乜野果d野?
老死 : 重扮野?緊係話你同佢拍拖啦
當時我飲緊水都即刻噴出黎
我 : 邊個話我同佢拍拖
老死 : 你重扮野?成日見你同佢同埋佢屋企人一齊重話無
我 : 咁我見得閒咪過去幫下手囉
老死 : 由唔見你過黎幫下我手?死仔
我 : 車，你叫到我得閒咪幫囉
老死 : 馬後炮，算啦、兩家人一齊去玩都重要扮野
我 : 你又知?
老死 : 佢同阿祺(我其中一個比較大年紀的老死女友，都係我屋苑識得既人)講話你人蠢無藥醫呀
我 : 攪乜個個都咁話我架
老死 : 阿恩叫你學游水播
我 : 係呀~佢重好大反應咁話我添
老死 : 咁你知唔知點解呀?
我 : 點知呀
年紀較大果個老死 : 佢同我女友講話鐘意你呀
我 : 下 ?
=-=-=-=-=-=-=-=
老死 : 乜你唔知咩?
我 : 我點解會知?
老死 : 人地做到出晒面啦
我 : 做咩出面?
老死 : 問你佢浸親會點囉
我 : 咪答左佢話幫佢叫救生員囉
(大)老死 : 真係死蠢，人地咁講緊係想你去救佢啦
我 : 點救呀我又唔係叻
老死 : 咁咪去學囉
我 : 我識播
老死 : 再學叻d得唔得?
我 : …………
(大)老死 : 人地好女仔黎架
其實我唔係對佢無感覺
不過當時重細所以唔會咁去諗
老死 : 重諗乜野呀，佢又靚又乖升到中學大把人追架
我 : ………
老死 : 咪話唔話你聽，中學同小學d人好唔同架，如果係鐘意人就同人講啦
我 : 點講先得架
老死(成班人) : 你諗你啦~~~~
=-=-=-=-=-=-=-=
當時既我聽到佢地咁講都有幾分無助
不過都試下硬著頭皮去做

暑假完前果晚
佢家人如常咁招呼我地去食飯
先完之後我就同佢講不如落街行下散下步

行行下我同佢講
我 : 阿恩我去學游水播
阿恩 : 車 ~關我乜野事
我 : 無~等你下次浸親我去救你囉
阿恩 : 車~你話等救生員救嘛
我 : 諗諗下你咁重叫得黎都瓜左啦
阿恩 : 你講乜野話?
我 : 同埋我唔想睇住妳有事我幫到
阿恩 : 呵~係至好講啦
我 : 緊係

之後我就拖住佢隻手
佢覺得好意外(其實果次我第一次拖佢隻手)
不過我無理佢就一齊繼續行多陣
=-=-=-=-=-=-=-=
其實果次之後我都未表明話鐘意佢
不過大家既關系感覺上親密左

中學開學
而家諗番唔知係咪到左所謂既反叛期
果時同成班同學成日唔交功課，上堂顧住玩同唔留心聽書
lunch 放學就剩係識打波
成績顧然差左
同埋中學係全日制
變左好多時唔洗上阿恩屋企
阿恩係學校見到都會話下我
不過好多時話話下把同學就會係度串串貢咁話”老婆鬧老公咁無面架”之類既野
當時想唔衰得咪會駁番阿恩幾句

中一派成績表
自己睇到都嚇左一跳
2大過 3小過 2缺點
成績滿江紅
番到屋企重比人話到飛起
同番阿恩講佢都話唔抵可憐

臨放暑假一日
係操場同班同學同其他班打波
點知對方有人覺得輸左唔”份”氣
郁手推撞我果邊d人
於是我就推開佢叫佢咪打
點知佢一拳打埋黎打中我個咀
成崩牙及左落牙肉度
重流到成地血
之後阿恩見到就係度好驚惶失惜
無耐有阿sir過黎見到就問係咪有人打架
我果時好淆底
因為我身懷大量案底
如果我再犯事整多個缺點就已經可以踢出校
就係果刻阿恩出聲同阿sir講話唔關我事係人地出手先
其他人都幫口出聲

之後阿sir call幫我白車
我睇住阿恩有d眼濕濕咁望我上車
當時我先知佢真係好緊張我
就咁我就跟車左新墟果邊間診所(唔記得左係咪屯醫未開所以先過去果邊)
重連左幾針
之後我媽黎接我話橫掂放左半日
不如去睇場戲先
之後去左睇”唐白虎點秋春”
睇完就去多次新墟診所連針(因為笑到爆左線):o)
=-=-=-=-=-=-=-=
果晚係屋企食完飯
無無聊聊準備打機之際
聽到有人禁鐘
原來係阿恩黎搵我睇下我點
之後又同佢落街行下

係街度..
阿恩 : 點呀你個咀
我 : 爆左囉
阿恩 : 睇下
之後無啦啦錫左啖埋黎
當時我呆左一呆
阿恩 : 而家有無好d
我 : 岩岩果下攪到我有少少痛
阿恩 : 咁我唔錫囉
我 : 哦…咁好啦(扮無奈)
阿恩 : 下?
我 : 下次等我錫
阿恩 : 下?
我 : 阿恩…我鐘意你
當時係我第1次好認真咁同佢講呢番說話
佢聽完有d面紅
阿恩 : e……
我 : 阿恩，做我女朋友呀
阿恩 : 我想唔同d成績滿江紅既人一齊囉
我 : 咁好似以前咁你教我咪得囉
阿恩 : 咁好啦~你咁樣求我我就教你啦
之後我想錫佢之際佢就話
阿恩 : 等你個豬咀好番先算啦豬咀倫

跟住果一年
少左同自己同學玩
專心左去讀書
期中試成績唔係話太好
不過都叫做無咁多紅
到左學期尾重更加係全黑(全部緊緊合格)
=-=-=-=-=-=-=-=
果年暑假開始某日
我同埋成班老死一齊去游水
我就緊係帶埋佢一齊去啦
(其實中二學期完左之後我就已經同佢係男女朋友關系，不過得我班老死知，之後學校d人都係到好後期先知)
成班人你追我逐咁玩得好開心
之後玩下又少左個
玩下又少左個
原來個個走晒去搵女(自己帶去果d唔係去搭訕)
咁我就緊係同佢行下去游水啦

我 : 而家識得游啦~
阿恩 : 你教得好o者
我 : 咁又係，我就緊係叻啦
阿恩 : 係啦知你叻啦

講講下隻腳無端端痛左一痛
原來比隻白炸炸左一野
果時我同佢係浮台同沙灘之間
我唔敢話佢知有白炸驚嚇親佢亂郁會重易整親
所以求其同佢講話口渴想飲野不如上番水
之後上到水佢見到我隻腳有撻好深色既紅印
問我發生乜野事
我見上番水面就同佢講話岩岩有白炸炸到我
之後我同佢就去救護站度整理傷口
好在果日撞岩有fd有帶車去可以一程番到去
唔洗成日轉車驚整到隻腳
=-=-=-=-=-=-=-=
同年暑假
有個人新買左部電單車
於是幾個人出去遊車河
去到唔記得邊度就泊低左車
成班人有傾有講
講講下就話不如試下架電單車
果時我無有識死咁就上左車踩左轉
比油就唔知飛唔左去邊
之後見到個彎位後就無晒記憶

一起身就見到自己訓左係醫院
身邊見到阿恩..佢家人同埋我家人
隻手同隻腳打晒石膏
(後尾聽d 老死講番話佢地係個彎位度執番我番黎，我問架車點，佢地就話架車剩係花左少少咁大把，我就成身花晒囉)
果時見到阿恩對眼紅晒腫晒
我就問話又唔係發生乜野事洗唔洗喊成咁
屋企人話番原來我已經訓左幾日醫院醒都未醒過
佢就日日陪住我咁多日
睇見佢咁我當時好心痛同好內疚
之後果次開始我就好驚d女仔係我面前喊
我同佢講我以後會乖乖地唔再令佢咁擔心
之後佢就重喊得犀利
家人見到就行左出去等佢陪住我身邊
=-=-=-=-=-=-=-=
果次整親足足訓左幾個禮拜醫院
因為果次抄車攪到自己衰左
之後要跛住咁去上庭
好彩唔係罰d乜野
剩係判夠18歲後停牌7年(即係7年唔可以考牌)

係醫院果段時間
阿恩日日都有黎睇我
就算出左院佢都會成日去我屋企照顧我
果時我家人都差唔多當正佢係心袍咁濟
係未出聲講o者
=-=-=-=-=-=-=-=
中3果年
我同佢都重係同一班
不過初期我同佢都好多時各有各玩
一來費事好似中一果時咁
二來比阿sir miss見到就無謂啦
不過都會放學約埋係某個地方後一齊搭車番去

果年聖誕節係我同佢第一次以真正男女朋友身份一齊過
果日晏晝同家人申請夜歸(其實都係12點前果d)
老豆就一野整個避孕袋黎話 “你大個仔啦要生生性性唔好亂攪出人命呀”
之後阿媽聽到就緊係話鬼佢啦
我無拎到就出門口行上去樓上同阿恩出尖咀

果時條街雖然好凍
不過我同佢都覺得唔緊要
我同佢行下睇下燈飾
之後撞到我表姐佢地
佢地就請我地去食自助餐
之後食完一齊行完之後又各有各行
行左一陣我就見佢好似覺得真係好凍就話不如番去啦
之後就搭番車番屋企
=-=-=-=-=-=-=-=
新年果年
我帶埋佢去我大伯度拜年
佢地當住阿恩面前就係咁話我人細鬼大十幾歲人學人拍拖
但係背住我就同阿恩講呢個百厭星黎架要好好地睇住佢唔好比佢亂黎
之後同表姐佢地傾開原來係佢地講比我大伯知我拍拖
不過我又無介意過
反正係事實

中三果年學校社界運動會因為係受到社長推舉
比人點左去做女子啦啦隊隊長做指揮
要長駐係自己個社度做指揮
攪到我同佢果陣見唔到
好彩放lunch都會特登約埋過去新都會果頭食野
盡量避開d其他同學
不過果段時間就變左審犯時間
問我有無望其他女仔，有無比女仔撩，有無撩女仔之類
雖然係咁但係我都覺得好開心

不過就算去到新都會果邊
都係比自己班同學見到
之後都比同學唱左一排
但我就同佢地講知就算唔好咁揚
好彩到後尾都佢地都行聽
無乜特別事發生
=-=-=-=-=-=-=-=
有一日
我幫緊miss手
無啦啦我班個同學同我講話阿恩係天橋果邊比 馬登 d人撩
之後我就同個同學出去睇發生乜野事
去到見到有幾個人係度圍住佢
我就同佢地講乜野事呀
之後見到阿恩佢好無助咁我就一野撞開其中一個
拖住佢隻手就無理佢地同佢行番去學校果邊
當時佢地係係咁講話 ” 走啦傻仔，條女有你d咁既仔真係仆街”之類果種挑釁性說話
我果時好慶好想郁手不過阿恩係側邊我驚佢會擔心
同埋唔知之後佢地會點所以都係拖住佢行番去學校
但係班 馬登 好似見到好恰就由後面追番上黎繼續講
就係果時我學校個訓導就行上黎睇發生乜野事
佢地見唔對路就掉頭走左
唔知係咪發生呢件事後開始
天橋果邊有段時間成日有學校阿sir巡
=-=-=-=-=-=-=-=
中3果年派表
我果年成績差左派唔到
佢就原校直升
搵唔到學校收
就決定去私校遵理讀
果時屋企個細妹開始讀書
我唔想屋企付擔太大就去左7仔做part-time
自己供自己讀埋個中四中五佢

果時遵理番半晝
星期一至五我就放學做完功課就出去番工
之後阿恩會去接我收工
果時我雖然覺得幾辛苦
但都覺得好滿足好幸褔
每逢星期六日就同班老死聚下玩下癲下
而家諗番真係覺得果段時光係好開心
=-=-=-=-=-=-=-=
中五果年
有日落街發生左d事(唔想又打多次…想知去呢道睇番)
http://forum.hkgolden.com/view.asp?message=1164225&page=3
成臉腫晒傷晒咁番到屋企
比家人同佢小左一鑊
話我唔好脾氣又郁手郁腳之類
我心諗我咁唔好脾氣其實都係老豆教番黎
(其實我老豆時好時差，好果時會好錫我，差果時試過爆我瓶打穿頭要縫針同埋而家個鼻樑位都有少少”咩”)
不過見佢地咁關心我都係想我好o者
我就由得比佢地話我
=-=-=-=-=-=-=-=
97年過左幾日我細佬出左世
屋企又多一個新成員
本來呢件係值得開心既事
不過同時又出現呢一樣唔開心既事
我母親有癌症
而且已經幾嚴重
我地追問點解大肚果時會check唔到
早d知咪可以及早治療囉
醫生解釋話佢患既係胰臟癌
岩岩普通咁照岩岩比個胎遮住
同埋話我地可能發覺唔到有什麼異樣
以為好多野都係因為大緊肚影響
我地聽到都好難過
但我母親反而安慰番我地
都已經係事實
果時我地可以做的就係盡量咁對佢好
另一方面就係盡量用當時的醫學方法去治療她

番到屋企
我同番阿恩講番
佢都好難過
不過佢都同我講番
就算點唔開心都唔好係我母親面前表比佢見到
費事佢擔心番我地
果時我都知係好難
不過都覺得佢好有道理都盡量咁去做
=-=-=-=-=-=-=-=
97年3月
就黎到佢生日
果年雖然發生左d事令大家都唔開心
不過生日無理由都要佢唔開心
所以果陣時我決定比個驚喜佢

我用我之前打工交完費+平時洗費剩下來的錢
我知道佢鐘意熊仔公仔
所以買左個大公仔，頸鍊，一紮花同蛋糕
阿恩生日果日我帶左紮花同蛋榚上去送比佢
發覺果日佢屋企無人
佢話佢地知道今日我會同佢慶祝生日
所以出左街
當時我見到佢係度準備緊晚餐
我就覺得佢將來實會係一個好老婆

果日食完晚餐同蛋榚
佢就問我剩係得紮花就乜都無啦
我同佢講緊係唔係啦
之後就落番樓下
將條頸鍊收收埋埋咁掛係公仔條頸度拎上去
佢見到個公仔即刻好開心
同我講話好鐘意
之後我再叫佢攬下佢啦
佢就一野將佢攬到實一實
之後發現條鍊就問好條鍊好靚 係咪好貴
我同佢講一般啦
之後佢話番我送個公仔就得啦
唔好亂咁洗錢
送個公仔比佢已經好開心
我聽到覺得好感動
之後就錫左
跟住就係佢屋企發生左我同佢的第一次
=-=-=-=-=-=-=-=
果年會考前夕
母親病情急劇惡化得好嚴重
醫生話隨時都有機會唔得
當時我覺得不知所措
就黎會考
心情好煩好沉重
但又唔可以比佢睇到驚佢擔心
真係好難受
好彩當時阿恩佢陪住我
如果唔係我當時都唔知點算

會考開始
但係對當時的我黎講都係聽到惡耗的開始
考第一科果日
收到醫院電話話我老母就黎唔得
快d去醫院睇佢
之後我就連會考都無去就飛的去醫院
果時見到佢我真係覺得好唔開心
重喊左出黎
我阿媽掉番轉頭鼓勵番我話我同以前比已經生性左好多
重好識諗、唔想成日比麻煩人
我聽完重喊得好激動
佢撫摸我個頭同我講生死有命…辛苦左好耐想抖下
跟住就合埋眼
之後發現心臟脈搏機都無埋反應
就咁我母親就離開左我地
每個人都好傷心
阿恩同我講:”要喊係呢度好喊埋佢
出到去就要堅強番去做人”

其後果幾場會考我都無去
走去幫 d fd手做part time
因為果陣時屋企唔係好夠錢去攪身後事
同埋又要幫手辦身後事的鎖碎事
所以會考成績重衰過拎U
不過無法啦
家境唔好
我自己都無資格怨自己
當時阿恩考完會考都會去我屋企照顧細佬妹
又煮埋飯比我地
係果時我真係好多謝佢係我屋企最需要人支持既時候睇住我地

=-=-=-=(黎料)

到左18歲
我正式出黎做長工
而佢都無讀書出埋黎做野
果時我同佢邊個收工先都會約定一個近兩個的地方搭車番去
係果陣時我覺得同佢會有過美好將來
不過另一件係我暫時一生人中第二樣難過既事又準備發生
果年12月
佢同家人因為一d事要過去加拿大
無法 因為聽聞佢果邊親戚有事要過去幫手
之後過左去
初頭同佢都重keep住有用icq聯絡
但12月24號開始就無左見佢online
我唔知佢發生乜野事所以好擔心

之左幾日
除夕當晚佢家人番左黎
我問佢地點解唔見阿恩
佢地初頭叫我冷靜聽佢地講
我果時心知不妙
係咁追問佢發生乜野事
佢地就同我講佢平安夜果晚發生左交通意外
過左一日之後傷重不治
我聽完成個人呆左無晒反應
一年之內連續失去左兩個我最鐘意既人
我成個人當時剩係識係度傻笑
佢地就叫我冷靜d
佢有遺言同我講話:
如果佢真係有事叫我唔好咁傷心
同埋有機會就搵過第2個
我聽完之後不停咁喊
喊到收唔到
佢地見到我咁都安慰我唔好咁難過
佢在天之靈見到會重擔心你
咁佢走都走得唔安樂啦
我聽到都覺得係岩
不過真係忍唔到
之後腦內面無端端好似聽到一把聲同我講
“要喊係呢度好喊埋佢
出到去就要堅強番去做人”
之後我都強忍住
同佢地講我無事
之後就番左屋企
=-=-=-=-=-=-=-=
無幾耐
我跟住阿恩家人去加拿大去接佢番黎hk
之後係hk辦身後事
阿恩家人其後搬左屋
不過重有keep住聯絡
同埋每逢佢生忌死忌都會去拜佢
就算係其後我有拍拖
我都會盡量抽空去

今年佢家人因為一些事會離開hk
所以連埋佢個靈位都要拎埋走
雖然係咁
但係我每年到呢兩日我都會諗番起我同佢一齊發生過既所有事
頭先同阿恩家人餞行
搭車果陣我又再一次諗起佢
個心都重會有少少”那住那住”

to 阿恩:
10年啦
唔經唔覺你原來離開左我已經整整10年
到而家我都重係有想起妳
我第1份用自己錢買黎送比你既生日禮物公仔我到而家都重keep住
妳同我講過既說話我都好記得
每個同妳一齊過既日子我都好開心
雖然妳已經睇唔到我打呢篇野
不過我只係想我心中既你知道
你係我心目中個地位係無變
就算對其後其他將會拍拖，結婚既女仔唔公平都好
妳永遠係我一生人之中最愛果個
//*********************************************************//

巴打,唔駛忍喎！
再唔係加首”活著多好”同”人來人往”俾你
補返︰阿恩生日快樂！

我成日都話,我唔想有女朋友,唔想結婚
我寧願唔要愛情帶黎既快樂,藉此換黎既係,呢世都唔會有咁深刻既痛
講真,我寧願平平凡凡過日子算喇
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
附送︰

毛公仔…
俾我一定唔會擺係當眼位,喊死人咩